في حب الرز وانه طبق أساسي علي سفرتك وبعيد عن طرق طبخ الرز التقليدية هنقدم ملف لطرق طبخ الرزالمختلفة مع مطبخ العائلة شيف محمد بقشيش

10/1/2018 2:56:08 PM







🍚الرز البخاري باللحمه:
المقادير:
4قطع لحمة ضاني 
2 بصلة
2طماطم 
جزره
معلقه صغيره كمون 
4فصوص حبهان 
ملح 
فلفل اسود
زيت 
2معلقه كبيره مكسرات 
3كوب ماء 
كوب ونص رز 
الطريقة:
نفرم البصل والطماطم ونقطع الجزر بالطول ونغسل الرز ويتنقع نص ساعه وبعدين نصفيه هنحمر البصل لما يصفر ونضيف اللحمه ونقلب لحد ما تنشف ميتها هنضيف الطماطم والبهارات والملح ونقلب ونضيف المايه ونغطي لحد ما تستوي هنضيف الجزر ونقلب وبعدين هنضيف الرز ونظبط معيار المايه تكون مغطية الرز عقلة صباع ولما يغلي نهدي النار ونسيبه لما يستوي هنحمر المكسرات ونزين بيها الرز لما يتقدم

🍚رز بالبصل والزبيب :
المقادير:
كوب رز
كوب ونص ماء
بصلة
ملح
3فصوص حبهان
ربع كوب زبيب
زيت
الطريقة:
نغسل الرز ويتنقع ربع ساعة وبعدين نصفيه. نحمر البصل دهبي اللون ونضيف الزبيب يتحمر ونحط الرز في حلة فيها ماية والحبهان والملح ونسيبه يغلي وبعدين نهدي النار لحد ما يستوي وبعدين نضيف خليط البصل للرز ونقلب وبعدين يتقدم

🍚رز بالزعفران:
المقادير:
2 وربع كوب رز 
3 كُوب ماء
3 فصوص حبهان 
2 حبة قرنفل 
معلقة صغيرة ملح 
مص معلقة صغيرة زعفران 
3 معالق كبار لبن 
الطريقة:
نغسل الرز ويتحط في حلة مع ماية وحبهان وقرنفل وملح ونسيبه لما يغلي ونهدي النار ولما يقرب يستوي نحط الزعفران علي اللبن علي النار لحد ما اللبن يبقي دافي ونشيله ونحط الخليط ده علي الرز ونقلب ونسيبه لحد ما يستوي

🍚رز باللحمة المفرومة والبسلة:
المقادير:
3 كُوب رز
ربع كوب زيت
ربع كيلو لحمة مفرومة
2 كوب بسلة
ربع معلقة صغيرة فلفل اسود
ربع معلقة صغيرة كسبرة ناشفة
ربع معلقه صغيرة كمون 
3 معلقة صغيرة ملح
5 كوب ماء 
الطريقة:
نغسل الرز ويتنقع في ماية وملح ربع ساعة وبعدين نصفيه هنحمر اللحمة في زيت ونقلب لحد ما تنشف ميتها وبعدين نضيف البسلة والفلفل الأسود والملح والبهارات ونقلب كويس ونسيبها علي نار متوسطة لحد ما تستوي نحط ماية وملح في حلة ولما تغلي نحط الرز ولما يغلي نهدي النار ونسيبه لحد ما يستوي وبعدين نحط الرز في طبق التقديم وعليه خليط اللحمه

🍚رز بالليمون:
المقادير:
4كوب رز
4ونص كوب ماء 
معلقة صغيرة بشر ليمون
٢معلقة كبيرة عصير ليمون
معلقه صغيرة ملح 
2ورق لورا 
ربع كوب زبيب 
3فصوص حبهان 
الطريقة:
نغسل الرز ويتنقع ربع ساعه في ماية وملح وبعدين نصفيه 
نحط ماية في حلة وعليها بشر الليمون وعصير الليمون والملح وورق اللورا والحبهان ولما يغلي نحط الرز ونقلب ولما يغلي نحط الزبيب ونغطي ونسيبه لما يستوي

🍚رز باللحمة المفرومة والزبيب:
المقادير:
2كوب رز 
3معلقة كبيره زيت 
نص كوب لوز
بصلة
ربع كيلو لحمة مفرومة
نص معلقة صغيرة زعفران
نص معلقة صغيرة قرفة
نص معلقه صغيرة كمون 
نص معلقة صغيرة كسبرة ناشفه
معلقه صغيرة ونص ملح
نص كوب زبيب
3كوب ماء
الطريقة:
نغسل الرز ويتنقع في مائه وملح ربع ساعة وبعدين نصفيه
نحمر اللوز في الزيت ونصفيه 
نحمر البصل لحد ما يبقي لونه دهبي نضيف اللحمة المفرومة ونقلب لحد ما تنشف ونضيف البهارات والزبيب ونقلب ونضيف الماية وبعدين الرز ونقلب ونسيبه لما يغلي نسيبه علي نار هاديه لحد ما يستوي ويتقدم الرز ويتزين باللوز المحمص

🍚رز السليق بالفراخ:
المقادير:
فرخة مقطعه اربعه
رز
علبة قشطة
ملح. فلفل اسود
3 فصوص مستكة
5فصوص حبهان
معلقتين سمنة
الطريقة:
هنسلق الفرخة مع الملح والفلفل الأسود والحبهان والمستكة لحد ما تستوي نصفي الفرخة ونحطها في الفرن وندهنها سمنه ونرش عليها فلفل اسود 
نحط الرز علي شوربة الفراخ ونظبط المعيار ونسيبه لحد ما يستوي نضيف القشطة علي الرز ونقلب ونقدمه في طبق وعليه الفراخ المحمرة

🍚كبة الرز:
المقادير:
2كوب رز
2ونص كوب ماء 
نص كيلو لحمة مفرومة 
6فصوص توم
معلقة صغيرة ملح
معلقة صغيرة حبهان مطحون 
معلقة صغيرة كمون
معلقة صغيرة كسبرة ناشفة
ربع كوب حُمُّص اصفر 
2بصلة
٢معلقة كبيرة زيت
الطريقة :
تنقع الرز ربع ساعة في ماية دافيه وبعدين يتسلق وينساب لما يستوي نفرم البصل والتوم وتسلق الحمص لحد ما يستوي خالص ونصفيه نحمر البصل ونضيف عليه الحمص ونقلب وبعدين نسيبه لما يبرد 
نحط الرز مع اللحمة المفرومة والتوم والبهارات ونفّرمهم ناعم جدا ناخد حوالي معلقتين كبار من خليط اللحمة ونشكلها كور ونحشيها من خليط الحمص ونقفلها وتتحط في التلاجه ساعه تقريبا وتطلع تتقلب في زيت غزير ويبقي لونها دهبي

🍚المقلوبة بالقرنبيط :
المقادير:
2كوب رز
قرنبيطة متوسطة الحجم
فرخة مقطعه اربعه
بصلة كبيرة
معلقة كبيرة ملح 
5فصوص حبهان
2ورق لورا
عود قرفة
فلفل اسود
معلقة صغيرة كركم
معلقة صغيرة قرفة
معلقة صغيرة بهارات مشكلة
نص معلقة صغيرة كمون
زيت دره
الطريقة:
نغسل الرز ويتنقع في ماية دافئة من 20-25 دقيقة
هنسلق الفرخة مع ملح وبصل وحبهان وعود القرفة ورق لورا ونسيبها لحد ما تستوي هنشيِّل الفرخة ونصفي الشوربة ونحط عليها كل البهارات 
هنقطع القرنبيط قطع صغيرة ونقليه في زيت بلون دهبي 
هنضيف الرز ونجيب طاجن نحط فيه تلات معالق رز ونرص عليهم الفراخ وبعدين القرنبيط وبعدين باقي كمية الرز وعليهم شوربة الفراخ هنسيبه علي نار متوسطة لحد ما يغلي ونهدي النار ونسيبه لحد ما يستوي
نقلب الطاجن بحرص علي طبق التقديم

🍚رز بالخضار مع فراخ بانيه بالروزماري والجبنة الرومي :
طريقة الرز بالخضار:
هنشوح البسلة والجزر والمشروم في معلقتين زبدة وفص توم وبصلة متقطعة وملح وفلفل اسود وكاري وكركم ومكعب مرقة دجاج ونقلب شوية ونضيف عليهم 2 كوب رز بسمتي منقوع قبلها بنص ساعة ونضيف ماية او شوربة فراخ لو موجود ونظبط معيار الرز ونسيبه لما يستوي 
طريقة الفراخ:
فراخ بانيه هنقليها وبعد القلي هنجيب معلقة زبده ونقلب فيها فص توم مفروم وعودين روز ماري 
متقطعين ونقلب فيهم الفراخ وعليهم رشة جبنة رومي مبشورة ودوقي احلي طعم يجننن
وبالف هنا

اضف تعليق

التعليقات

لا توجد تعليقات على الخبر اضف تعليق

 

 


لن يتم عرض التعليق فى الجزء الخاص بالتعليقات إلا بعد موافقة إدارة الموقع عليه وشكرا لمتابعتنا

سوشيال

تابعونا على جميع الوسائل الاكترونية الاعلامية

مقالات الرأى

المزيد من مقالات الرأى